راہول گاندھی کی حمایت میں جمعیۃ علماء ہند سامنے آئی

راہل گاندھی نے پارلیمنٹ میں اپوزیشن لیڈر کے طور پر جو تقریر کی ہے اس کی ہر طرف ستائش ہو رہی ہے۔ ایسے میں جمعیۃ علماء ہند نے ایک بیان میں کہا کہ وہ راہول گاندھی کی باتوں کی تائید کرتی ہے۔ یہی نہیں، جمعیت نے امید ظاہر کی ہے کہ اپوزیشن کے دیگر رہنما بھی پارلیمنٹ میں تشدد، نفرت اور ناانصافی کے خلاف بلا خوف آواز اٹھائیں گے۔

جمعیۃ علماء ہند کے صدر مولانا ارشد مدنی نے کل پارلیمنٹ میں راہول گاندھی کی تقریر کے بارے میں کہا کہ ان کی تنظیم لوک سبھا میں اپوزیشن لیڈر راہل گاندھی نے تشدد اور نفرت کے بارے میں جو کہا اس کی حمایت کرتی ہے۔ انہوں نے کہا کہ دنیا کا کوئی مذہب تشدد اور نفرت پھیلانے کی اجازت نہیں دیتا۔ انہوں نے مزید کہا کہ مذہب پیار و محبت کے ساتھ انسانیت، رواداری اور اتحاد کا پیغام دیتا ہے۔ جو لوگ مذہب کو نفرت اور تشدد پھیلانے کے لیے استعمال کرتے ہیں وہ اپنے مذہب کے سچے پیروکار نہیں ہو سکتے۔ مولانا مدنی نے مزید کہا ہے کہ باشعور لوگوں کو ایسے لوگوں کی ہر سطح پر مذمت اور مخالفت کرنی چاہیے۔

اشتہار

اس کے ساتھ ہی انہوں نے خوشی کا اظہار کرتے ہوئے کہا کہ ہمیں خوشی ہے کہ راہول گاندھی نے اپوزیشن لیڈر کی حیثیت سے پارلیمنٹ میں اپنی پہلی ہی تقریر میں بے خوفی سے تشدد اور نفرت کے خلاف آواز اٹھائی ہے۔ انہوں نے امید ظاہر کی کہ راہول گاندھی کی پیروی کرتے ہوئے اپوزیشن کے دیگر رہنما بھی بے خوف ہوکر پارلیمنٹ میں تشدد، نفرت اور ناانصافی کے خلاف آواز اٹھائیں گے۔