مسلم پولیس والے داڑھی رکھ سکتے ہیں: مدراس ہائی کورٹ

چنئی مدراس ہائی کورٹ نے اپنے ایک فیصلے میں کہا کہ ہندوستان متنوع مذاہب اور رسم و رواج کا ملک ہے، اقلیتی برادریوں کے ملازمین بالخصوص مسلم ملازمین کو داڑھی رکھنے پر سزا نہیں دی جا سکتی۔ عدالت نے اپنے حکم میں یہ بھی کہا کہ مدراس پولیس گزٹ کے مطابق افسران کو داڑھی رکھنے کی اجازت نہیں دی جا سکتی، لیکن مسلم پولیس افسران زندگی بھر داڑھی رکھنے کے حقدار ہیں۔ عدالت نے کہا کہ محکمہ پولیس میں سخت نظم و ضبط کی ضرورت ہے لیکن اس کا یہ مطلب نہیں کہ اقلیتی برادری سے تعلق رکھنے والے اہلکار کو داڑھی رکھنے پر سزا دی جا سکتی ہے۔

عدالت عبدالخادر ابراہیم کی درخواست پر سماعت کر رہی تھی۔ ابراہیم کو 2019 میں گریڈ 1 کے پولیس کانسٹیبل کے عہدے پر ترقی دی گئی تھی۔ کمائی ہوئی چھٹی کے 31 دن مکمل ہونے کے بعد بھی ڈیوٹی پر رپورٹ نہ کرنے اور مدراس پولیس گزٹ کے حکم کے خلاف داڑھی رکھنے پر ان کے خلاف تحقیقات شروع کی گئی تھیں۔ تفتیشی افسر نے الزامات کو درست پایا اور ڈپٹی کمشنر آف پولیس (آرمڈ ریزرو) نے مجموعی اثر کے ساتھ 3 سال کے لیے انکریمنٹ کو روکنے کا حکم دیا۔ تاہم اپیل کے بعد پولیس کمشنر نے حکم نامے میں ترمیم کرتے ہوئے انکریمنٹ روکنے کا وقت 3 سال سے گھٹا کر دو سال کر دیا۔ جس کے بعد ابراہیم عدالت پہنچے۔

اشتہار